بۆلجۈرگەن، كۆپ يىللىق سامان غوللۇق ئۆسۈملۈكنىڭ مىۋىسى بولۇپ، ئەسلىدە جەنۇبى ئامېرىكا قىتئەسىدە ئۆستۈرۈلگەن، ھازىر دۆلىتىمىزنىڭ ھەر قايسى جايلىرى ۋە ياۋرۇپا قاتارلىق جايلاردا كەڭ يىتىشتۈرۈلىدۇ. بۆلجۈرگەن تەركىبىدە كۆپ خىل ئۇزۇقلۇق ماددىلار بار بولۇپ، بەلگىلىك دەرىجىدە ساغلاملىق ئۈنۈمىگە ئىگە.
   خەنزۇچە ئاتىلىشى: 草莓
   لاتىنچە ئاتىلىشى: Fragaria × ananassa Duch.
   ئېنگىلىزچە ئاتىلىشى: strawberry
   تەۋەلىكى: ئۆسۈملۈكلەر دۇنياسى—يېپىق ئۇرۇقلۇق ئۆسۈملۈكلەر تىپى—قوش پەللىلىك ئۆسۈملۈكلەر سىنىپى—ئەتىرگۈل ئەترىتى—ئەتىرگۈل ئائىلىسى—بۆلجۈرگەن ئۇرۇقدېشى

ئۇزۇقلۇق تەركىبى
   ھەر 100گىرام بۆلجۈرگەن تەركىبىدە، تەخمىنەن 32 كىلوكالورىيە ئېنېرگىيە، 0.7 گىرام ئاقسىل، 0.3 گىرام ياغ، 0.2 گىرام يەككە تويۇنمىغان ياغ كىسلاتاسى، 7.7 گىرام كاربون سۇ بىرىكمىلىرى، 4.9 گىرام شېكەر، 2 گىرام تالا ماددىسى، 24 مىكروگىرام فولىن كىسلاتا، 1 مىللىگىرام ناترىي، 13 مىللىگىرام ماگنىي، 24 مىللىگىرام فوسفور، 153 مىللىگىرام كالىي، 16 مىللىگىرام كالتسىي، 0.4 مىللىگىرام تۆمۈر، 0.14 مىللىگىرام سىنىك، 1 مىكروگىرام ۋىيتامىن A، 0.02 مىللىگىرام ۋىتامىن B1، 0.02 مىللىگىرام ۋىتامىن B2، 0.39 مىللىگىرام نىكوتىنىك كىسلاتا، 0.05 مىللىگىرام ۋىتامىن B6، 58.8 مىللىگىرام ۋىتامىن C، 0.29 مىللىگىرام ۋىتامىن E، 2.2 مىكروگىرام ۋىتامىن K بار.
ئىستېمال قىممىتى
   كۆرۈش قۇۋۋىتىنى ئاسراش: بۆلجۈرگەن تەركىبىدىكى كاروتىن بىلەن ۋىتامىن A، كېچىسى كۆرەلمەسلىك كېسىلىنى ياخشىلايدىغان بولۇپ، يۇقىرى تېرە ئورگانىزىمىنىڭ ساغلاملىقىنى ئاسراش، كۆزنى روشەنلەشتۈرۈپ جىگەرنى ئاسراش، ئۆسۈپ-يېتىلىشنى ئىلگىرى سۈرۈش قاتارلىق ئۈنۈملەرگە ئىگە.
ھەزىم قىلىشقا ياردەملىشىپ قەۋزىيەتنىڭ ئالدىنى ئېلىش: بۆلجۈرگەن تەركىبىدىكى تالا ماددىلىرى، ئاشقازان ئۈچەينىڭ قىمىرلىشىنى ئىلگىرى سۈرۈپ، ئاشقازان ئۈچەيدىكى يېمەكلىكلەرنىڭ ھەزىم بولۇشىنى تېزلىتىدۇ ھەمدە بۇ ئارقىلىق قەۋزىيەتنى ياخشىلاپ بۇۋاسىر ۋە ئۈچەي راكىنىڭ ئالدىنى ئالىدۇ.